Tajpu per la X-metodo kaj la ĉapeloj aŭtomate aperos.

Aforismoj

En ĉi tiu kategorio estas 82 ŝercoj.

Alternativa vidpunkto pri tombejmuroj

Ekonomie, la konstruado de tombejmuro estas senutila. Ĉar la enaj ne povas eliri, kaj la eksteraj ne volas eniri.

Fonto: YACE - Der Preis der Macht (ekonomia suspensromano de Jonas Cord)

Viruso

Se Esperanto komencus disvastiĝi kiel viruso, esperantistoj tuj trovus vakcinon.

Rifuĝrimedo

Anstataŭ kaskon
mi portas maskon.

Fonto: HANDZLIK, Jerzy ; Epigramoj

Semaforismo XXX

"Frapu antaŭ ol eniri!" estas principo de boneduko. Jes, sed nur se temas pri pordo.

Fonto: SCHWARTZ, Raymond ; ... Kun siaspeca spico!

Semaforismo XXIX

"Sur nia terglobo ĉio estanta havis komencon kaj havos finon."
"Ne!" protestas la kolbasoj, "ni havas nur du finojn!"

Fonto: SCHWARTZ, Raymond ; ... Kun siaspeca spico!

Semaforismo XXVIII

Ankaŭ ne-plu-povipovaj maljunuletoj plenumas socian taskon. Ili kontribuas al plialtigo de la meza vivodaŭro de la homoj.

Fonto: SCHWARTZ, Raymond ; ... Kun siaspeca spico!

Semaforismo XXVI

Jen la vojo al feliĉa sereneco: Sciu ne ekscitiĝi pro bagatelo kaj, ĉefe, komprenu, ke laŭ certa vidpunkto ĉio estas begatelo, eĉ viaj propraj "grandaj faroj!"
La nura malfacilo estas adaptiĝi al tiu certa vidpunkto.

Fonto: Jen la vojo al feliĉa sereneco: Sciu ne ekscitiĝi pro bagatelo kaj, ĉefe, komprenu, ke laŭ certa vidpunkto ĉio estas begatelo, eĉ viaj propraj "grandaj faroj!" La nura malfacilo estas adaptiĝi al tiu certa vidpunkto.

Semaforismo XXVI

Jen la vojo al feliĉa sereneco: Sciu ne ekscitiĝi pro bagatelo kaj, ĉefe, komprenu, ke laŭ certa vidpunkto ĉio estas begatelo, eĉ viaj propraj "grandaj faroj!"
La nura malfacilo estas adaptiĝi al tiu certa vidpunkto.

Fonto: SCHWARTZ, Raymond ; ... Kun siaspeca spico!

Semaforismo XXIV

Ankaŭ en tio montriĝis la genio de Zamenhof, ke kvarcentpaĝajn gramatikojn li sciis resumi en dekses paragrafetoj.

Fonto: SCHWARTZ, Raymond ; ... Kun siaspeca spico!

Semaforismo XXIII

Ĉiuj lingvoj estus multe pli facilaj, se ne ekzistus poetoj.

Fonto: SCHWARTZ, Raymond ; ... Kun siaspeca spico!