Nigra humuro | Ridejo

Donaco de sango

Mi ĵus revenis de loko, kie oni povas donaci sangon.
Estis vane: Oni rajtas donaci nur propran, kaj ne estu en siteloj.

Kiam Antisteno [disĉiplo de Sokrato] estis enkondukita en la Orfajn Misterojn, kiuj, kontraste al la ŝtata religio, promesis al siaj sekvantoj vivon post morto, la pastro priskribis al li per entuziasmaj vortoj la komfortojn kaj ĝojojn, kiuj atendus lin en la submondo. „Do, kial vi ne mortas tuj?“ respondis la filozofo kun skeptika ironio.

Fonto: Diogeno Laertio, La Vivoj kaj Opinioj de Famaj Filozofoj

Alternativa vidpunkto pri tombejmuroj

Ekonomie, la konstruado de tombejmuro estas senutila. Ĉar la enaj ne povas eliri, kaj la eksteraj ne volas eniri.

Fonto: YACE - Der Preis der Macht (ekonomia suspensromano de Jonas Cord)

Malnova soveta ŝerco

Ĉe la landlimo, patro kaj filo rigardas la pikdratan barilon.
- Patro, kiu estas malantaŭ tiu barilo?
- Filo, ni estas malantaŭ tiu barilo...

Fonto

Buĉa

Ĉu vi scias, kio okazis en la ukrainia urbo Buĉa dum la rusia agreso? Buĉado.

Brila estonteco

Vladimiro Putin vizitas klarvidiston:
-Kion vi vidas? Kion mi faros post jaro?
-Mi vidas vin en limuzino, en parado, la amasoj jubilas ĝoje.
-Bonege! Ĉu mi mansvingas kontente al ili?
-Ne, via ĉerko estas fermita.

Bone vivanta maljunulo

Mia avuiĉo (avo) vivis pli ol 100 jarojn.
Maten-, tag- kaj vespermanĝe li prenis kuleron da kaviaro kaj glutis ĝin helpe de tre bona viskio, post tio li fumadis kuban cigaron.
Por resti bonkondicia, li dufoje en semajno en restoracio mendis luksan bifstekon. Kaj energion donis al li regulaj rendevuoj kun junaj prostituitoj.
-Kaj pro kio li fine mortis?
Ni devis lin mortigi pro la altaj kostoj.

La fortaj politikaj ligoj inter Germanujo kaj Rusujo

Estas fortaj politikaj ligoj inter Germanujo kaj Rusujo.

Okaze de la parlamenta baloto en Germanujo ĉi-septembre, germanaj ekstremdekstraj politikistoj povas ĝui la subtenon de la publika rusa kanalo RT.

Okaze de la parlamenta baloto en Rusujo ĉi-septembre, rusaj opoziciaj politikistoj povas ĝui la subtenon de la publika germana hospitalo Charité.

Sorĉistino kuiras min

Sorĉistino kuiras min en supo.
Sorĉistino (frapas min per kulerego): Ĉesu *frapo* manĝi *frapo* ĉiujn *frapo* terpomojn *frapo frapo frapo*!

Fonto

Geografio

Panjo, bv. pridemandi min pri geografio!
-Bone. Kiu estas la ĉefurbo de Germanujo?
Berlino.
Kaj la ĉefurbo de Aŭstrujo?
Berlino.
-Hm. Kaj la ĉefurbo de Polujo?
Berlino.
-Eĥ, kaj la ĉefurbo de Francujo?
Berlino.
-Ne plaĉas al mi diri tion, sed vi vere estas malbona en geografio, mia kara Adolf.